پی ایس ایل 8، دوسرے ایلیمنٹر میں پشاور کا لاہور کو 172 رنز کا ہدف

پاکستان سپر لیگ ( پی ایس ایل) کے آٹھویں ایڈیشن کے ایلیمنٹر ٹو میں پشاور زلمی نے لاہور قلندرز کو 172 رنز کا ہدف دیدیا۔

قذافی سٹیڈیم میں ہونے والے ایلیمنٹر ٹو کے اہم میچ میں پشاور زلمی کے کپتان بابر اعظم نے ٹاس جیت کر حریف ٹیم لاہور قلندرز کیخلاف پہلے بیٹنگ کا فیصلہ کیا۔

پشاور زلمی بیٹنگ

پشاور زلمی کی طرف سے اننگز کا آغاز صائم ایوب اور کپتان بابر اعظم نے کیا، تاہم دوسرے اوورز میں جارحانہ انداز اپنانے کی کوشش میں لیفٹ ہینڈ بیٹر 5 گیندوں پر 9 سکور بنا کر زمان خان کی شاندار گیند پر بولڈ ہو گئے۔

اس دوران بابر اعظم اور نوجوان بیٹر محمد حارث نے وکٹ کے چاروں اطراف شاندار شارٹس کھیلے اور حریف باؤلرز کو بے بس کیے رکھا دونوں کے درمیان 60 گیندوں پر 89 سکور کی شراکت داری قائم ہوئی جس کا خاتمہ راشد خان نے کیا۔

افغان باؤر کی گیند پر بابر اعظم 36 گیندوں پر 42 سکور بنا کر ایل بی ڈبلیو ہو گئے۔ اسی اوور میں راشد نے انگلینڈ سے تعلق رکھنے والے ٹام کڈمور کو صفر پر پویلین واپس بھیج دیا۔

اس دوران محمد حارث نے جارحانہ انداز اپنایا اور باؤلرز کی خوب درگت بنائی، انہوں نے 54 گیندوں پر 85 سکور کی بڑی باری کھیلی۔ عامر جمال ایک سکور کے ساتھ زمان خان کی گیند پر چلتے بنے۔

پشاور زلمی نے مقررہ اوورز میں 5 وکٹوں کے نقصان پر 171 سکور بنائے۔ زمان خان اور راشد خان نے دو دو وکٹیں حاصل کیں۔

لاہور قلندرز سکواڈ

مرزا بیگ، فخر زمان ، عبد اللہ شفیق، سیم بلنگز، احسن حفیظ، سکندر رضا، ڈیوڈ ویزے، راشد خان، شاہین شاہ آفریدی، حارث رؤف، زمان خان

پشاور زلمی سکواڈ

بابر اعظم ، صائم ایوب، حسیب اللہ خان، محمد حارث، ٹام کڈمور، بھانوکا راجہ پاکسا، عامر جمال، عظمت اللہ عمرزئی، وہاب ریاض، مجیب الرحمان ، سلمان ارشاد

خیال رہے کہ گزشتہ روز پشاور زلمی نے سنسنی خیز میچ کے بعد اسلام آباد یونائیٹڈ کو آؤٹ کلاس کرتے ہوئے ایلیمنٹر ٹو میں جگہ بنائی تھی۔